ⴳ ⵢⴰⵏ ⴳⵉⵜⵏⵖ

ⵎⵃⵏⴷ ⵍⵄⵏⵚⵕ

Président du parti du Mouvement Populaire

ⴰⴷ ⵜⵡⴰⵍⵉⴹ

ⴰⵔⴳⴰⵣ ⵓⵏⵥⵉⵥ ⵏ ⵓⵡⴰⵏⴽ, ⴷ ⵓⵎⵓⵣⴰⵢ ⵏ ⵓⵎⵢⴰⵙ ⴰⵙⵔⵜⴰⵏ

ⵉⵎⵏⵣⴰⵢⵏ ⵉⵙⵉⵍⴰⵏⵏ ⵍⵍⵉ ⴼ ⵉⵜⵜⵓⵙⴽⴰⵔ ⵓⴽⴰⴱⴰⵕ ⵏ ⵓⵎⵓⵙⵙⵓ ⴰⵎⴷⵏⴰⵏ ⴳ ⵉⵎⵏⴰⴹⵏ ⵉⵙⵔⵜⴰⵏⵏ ⵓⵔ ⴳⴰⴷⴷⴰⵏⵉⵏ ⴳ ⵍⵎⵖⵔⵉⴱ ⴰⵜⵔⴰⵔ, ⵓⵔ ⵥⴹⴰⵕⵏ ⴰⴷ ⴱⴷⴷⵏ ⴷ ⵣⵣⵉⴳⵣⵏ ⵙ ⵢⴰⵜ ⵜⴷⵓⵙⵉ ⴷ ⵢⴰⵏ ⵓⴱⴷⴷⴰⴷ ⴰⵔ ⴰⵙⵙ ⴰⴷ, ⵎⵍⴰ ⵓⵔ ⵉⵟⵟⴰⴼ ⵓⴽⴰⴱⴰⵕ ⴰⴷ ⵉⵔⴳⴰⵣⵏ ⴳ ⵡⴰⵏⴰⵡ ⵏ ⵎⵃⵏⴷ ⵍⵄⵏⵚⵕ, ⵉⵔⴳⴰⵣⵏ ⵍⵍⵉ ⵜⵜⵓⵙⵙⴰⵏⵏⵉⵏ ⵙ ⵓⵙⵓⴼⵓ ⵏⵏⵙⵏ ⵉ ⵜⵎⵓⵔⵜ ⵏⵏⵙⵏ, ⴷ ⵓⵍⵜⴰⵖ ⵏⵏⵙⵏ ⴳ ⵜⵎⵙⴰⵔⵉⵏ ⵏⵏⵙ ⴷ ⵉⵎⵉⵥ ⵏⵏⵙ ⴳ ⵡⴰⵜⵉⴳⵏ ⵏⵏⵙ ⵥⵉⵍⵏⵉⵏ ⵍⵍⵉ ⵓⵔ ⵊⵊⵓ ⵉⵜⵜⵓⵙⵏⴼⴰⵍⵏ ⵎⵇⵇⴰⵔ ⵜⵜⵓⵙⵏⴼⴰⵍⵏ ⵉⴷⵖⴰⵔⵏ ⴷ ⵉⵚⴰⵃⴰⵜⵏ, ⵎⵃⵏⴷ ⵍⵄⵏⵚⵕ ⵉⴳⴰ ⴰⵔⴳⴰⵣ ⴰⵙⵔⵜⴰⵏ ⵉⵙⵎⵓⵏⵏ ⵊⴰⵔ ⵜⵓⵏⵥⵉⵥⵜ ⵜⴰⵙⵔⵜⴰⵏⵜ ⴷ ⵜⵉⵏ ⵓⴽⴰⴱⴰⵕ ⵏⵏⵙ ⵎⴰⴷ ⵜⵍⴰ ⵜⵓⴷⵔⵜ ⵏⵏⵙ, ⵉⵥⴹⴰⵕ ⴰⴷ ⵉⴼⵙⵉ ⴽⵓⵍⵍⵓ ⴰⵢⵏⵏⴰ ⴼ ⵜⵜⵎⵣⵔⴰⵢⵏ ⵡⵉⴷⴰ ⵜⵜⵎⴰⵖⵏⵉⵏ , ⴷ ⴰⵢⵍⵍⵉ ⴼ ⵉⵜⵜⵎⴰⵖ ⵙ ⵓⴱⴷⴷⴰⴷ ⵏⵏⵙ ⴰⵏⴰⵎⵓⵔ, ⴷ ⵡⴰⴷⴷⴰⴷⵏ ⵏⵏⵙ ⵓⵔ ⵉⴱⴹⵉⵏ ⴼ ⵓⴼⵔⴰⴽ ⵏⵏⵙ ⵉⵕⵚⴰⵏ ⵍⵍⵉ ⴱⴷⴷⴰ ⵉⴳⴰⵏ ⴰⵏⵎⵢⵓⵔ, ⴷ ⵓⵙⵉⵜⵜⵉ ⵏ ⵓⵎⵣⵔⴰⵢ ⴰⵙⵔⵜⴰⵏ ⵙ ⵜⵙⴳⴰ ⵏ ⵓⵎⵙⴰⵡⴰⵍ ⴷ ⵓⵎⵢⴰⵙ ⵓⵎⵏⵉⴳ ⵍⵍⵉ ⴱⴷⴷⴰ ⵉⵥⵕⵕⴰ ⵉⵙ ⴳⴰⵏ ⵓⴷⵎⴰⵡⵏ ⴰⵜⵜⵓⵢⵏⵉⵏ ⵏ ⵜⴷⵉⵎⵓⵇⵔⴰⵟⵉⵜ ⵉⵍⵍⴰⵏ ⴳ ⵚⴰⵃⴰ ⵏ ⵜⵎⵓⵔⵜ ⴷ ⵓⵏⵎⵓⵔⵉ.

ⵉⴱⴷⴷ ⵓⵙⵡⵉⵏⴳⵎ ⴰⵙⵔⵜⴰⵏ ⵏ ⵎⵃⵏⴷ ⵍⵄⵏⵚⵔ ⴼ ⵜⵔⵙⴰⵍ ⴷⵓⵙⵏⵉⵏ ⵏ ⵓⴼⵔⴰⴽ ⵓⵔ ⵉⵜⵜⵓⵎⴷⵓⴷⴰⵢⵏ ⵙ ⵜⵎⵥⵍⴰ ⵏ ⵜⴼⴰⴷⵉⵡⵉⵏ ⴷ ⵉⵎⴷⵓⴷⵉⵜⵏ, ⵙⴳ ⵓⵙⴰⵎⵓ ⵉ ⵜⵎⴼⵓⵥⵥⴰⵕ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⵎⴰⴳⵉⵜ ⴷ ⵡⴰⵜⵉⴳⵏ ⵏ ⵜⵎⵖⵔⵉⴱⵉⵜ, ⵙ ⵜⵎⵙⴰⵔⵉⵏ ⵜⵉⵙⵔⵜⴰⵏⵉⵏ ⵍⵍⵉ ⵢⵓⵙⵉ ⴼ ⵓⵎⴳⴳⵕⴹ ⵏⵏⵙ ⴷ ⴰⴼⴳⴰⵏ, ⵏⵖ ⴰⵎⵖⵏⴰⵙ ⴰⵙⵔⵜⴰⵏ ⴳ ⵓⴳⵯⵏⵙ ⵏ ⵓⴽⴰⴱⴰⵕ ⵏ ⵓⵎⵓⵙⵙⵓ ⴰⵎⴷⵏⴰⵏ, ⵜⵉⵍⵉ ⵖ ⵜⵣⵡⵉⵔⵉ, ⵜⴰⵎⴰⵖⵜ ⵏⵏⵙ ⵜⴰⵙⵓⵍⴰⵏⵜ ⵃⵎⴰ ⴰⴷ ⵜⵟⵟⵉⴼ ⵜⵎⴰⵣⵉⵖⵜ ⴰⴷⵖⴰⵔ ⵍⵍⵉ ⵜⵓⴽⵍⴰⵍ, ⵖⵎⴽ ⴰⵏⵏ ⴷ ⵓⵎⵣⴰⵖ ⵏ ⵓⵎⴰⴹⴰⵍ ⴰⴼⴰⵔⴰⵏ ⴷ ⵓⴷⵔⴰⵔ ⴷ ⵓⵙⵡⵓⵔⵉ ⵉ ⵜⴳⵎⵉ ⵏⵏⵙⵏ.

ⵎⵃⵏⴷ ⵍⵄⵏⵚⵕ ⵉⴳⴰ ⴰⵡⵔⵉⴽ ⴰⵙⵔⵜⴰⵏ ⵉⴼⴰⵡⵏ ⴳ ⵢⵉⴳⵔ ⴰⵙⵔⵜⴰⵏ ⴰⵎⵖⵔⵉⴱⵉ, ⴰⵔⴳⴰⵣ ⵏ ⵓⵡⴰⵏⴽ ⵙ ⵜⵓⴳⴳⴰ ⵏ ⵡⴰⵄⴷⴰⵡⵏ ⴷⴰⵜ ⵏ ⵜⴰⵔⵡⴰ ⵏ ⵓⵅⴰⵎ, ⵉⴳⴰ ⵙⴳ ⵉⴷ ⴱⴰⴱ ⵏ ⵜⵙⵔⵜⵉⵜ ⵍⵍⵉ ⵙⴳⵓⴷⵉⵏⵉⵏ ⵜⵉⵔⵎⵉⵜ ⵜⴰⵙⵔⵜⴰⵏⵜ ⵉⴳⴳⵓⵜⵏ, ⵉⵍⵍⴰⵏ ⵙⴳ ⵓⴳⴳⴰⵔ ⵏ ⵓⵣⴳⵏ ⵏ ⵜⴰⵙⵓⵜ, ⵉⵍⵓⵍ ⵓⵔⴳⴰⵣ ⴰⴷ ⴰⵔ ⵉⵙⴰⵡⴰⵍ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⴰⵔ ⵜⴰⵖⵏⵊⴰⵡⵜ ⵏ ⵡⵓⵔⵖ ⵏⵖ ⵏⵇⵇⵔⵜ ⴳ ⵉⵎⵉ ⵏⵏⵙ ⵜⵉⴳⵉⵔⴰ ⵏ ⵜⴼⵙⵓⵜ ⵏ ⵓⵙⴳⴳⵯⴰⵙ ⵏ 1942 ⴳ ⵢⴰⵏ ⵓⵙⵓⵏ ⵎⵓ ⵙⵙⵓⵜⵍⵏ ⵉⴷⵔⴰⵔⵏ ⵉⵙⵎ ⵏⵏⵙ ⵉⵙⴱⵓⵜⵏ ⴳ ⵜⴳⵔⴰⵡⵜ ⵏ ⴰⵢⵜ ⴱⴰⵣⴰ, ⴷⴼⴼⵉⵔ ⵉⵣⴷⵖ ⴳ ⵜⵖⵔⵎⵜ ⵏ ⵉⵎⵓⵣⵣⴰⵔ ⵎⵔⵎⵓⵛⴰ, ⵜⴰⵙⴳⴰ ⵏ ⴱⵓⵍⵎⴰⵏ, ⵉⴹⴼⵕ ⵜⵉⵖⵔⵉ ⵏⵏⵙ ⵜⴰⵎⵏⵣⵓⵜ ⴳ ⵓⵙⵓⵏ ⵏⵏⵙ, ⵜⵉⵖⵔⵉ ⵏ ⵓⵙⵉⵏⴰⵏ ⴳ ⵜⵖⵎⵔⵜ ⵏ ⵚⴼⵕⵓ, ⵉⵎⵎⴰⵜⵜⵉ ⵙ ⵕⵕⴱⴰⵟ ⵃⵎⴰ ⴰⴷ ⵉⵙⵎⴷ ⵜⵉⵖⵔⵉ ⵏⵏⵙ ⴳ ⵜⵉⵏⵎⵍ ⵏ ⵜⵙⴰⵡⴰⵢⴰⵜ ⴷ ⵓⴳⵓⴳⴰⵙⵙⵓⵔ. ⴳ ⵕⵕⴱⴰⵟ, ⵢⵓⵎⵥ ⴰⵙⵍⴽⵉⵏ ⵏ ⵉⵎⵉⵔ ⴰⵎⴰⵜⵜⵓⵢ ⵙⴳ ⵜⵉⵏⵎⵍ ⵜⴰⵏⴰⵎⵓⵔⵜ ⵏ ⵜⵎⵙⵙⵓⴳⵓⵔⵜ ⵜⴰⴳⴷⵓⴷⴰⵏⵜ.

ⵉⵙⵙⵏⵜⵉ ⵍⵄⵏⵚⵕ ⴰⴱⵔⵉⴷ ⵏⵏⵙ ⴰⵣⵣⵓⵍⴰⵏ ⴳ 1958 ⴷ ⴰⵎⵙⵖⴰⵏ ⴳ ⵜⵎⴰⵡⴰⵙⵜ ⵏ ⵜⵙⴰⵡⴰⵢⵜ ⴷ ⵓⴳⵓⴳⴰⵙⵙⵓⵔ, ⵉⴳ ⴳⵉⵙ ⴰⵏⵙⵙⵉⵅⴼ ⵏ ⵜⵏⴰⴼⵜ, ⵉⴳ ⵉⵍⵎⵎⴰ ⴰⵏⵎⵀⴰⵍ ⴰⵏⵎⵏⴰⴹ ⴳ ⵜⵖⵔⵎⵜ ⵏ ⵓⴳⴰⴷⵉⵔ, ⵉⵎⵇⵇⵓⵔ ⴳ ⵓⴱⵔⵉⴷ ⵏⵏⵙ ⴰⵣⵣⵓⵍⴰⵏ ⴰⵍⵍⵉⵖ ⵉⴳⴰ ⴰⵎⴰⵙⴰⵢ ⵏ ⵜⵣⵓⵏⵉ ⵏ ⵜⵎⵙⴰⵙⵜⵍⵜ ⴷ ⵜⴷⵔⵉⵎⵜ ⴷ ⵜⵎⵙⵎⵀⴰⵍⵉⵏ ⴷ ⵜⵖⴰⵡⵙⵉⵡⵉⵏ ⵜⵉⵎⴰⵜⴰⵢⵉⵏ, ⴷ ⵓⵏⵎⵀⴰⵍ ⵏ ⵜⵏⵓⴼⴰ ⵏ ⵜⵙⴰⵡⴰⵢⵜ, ⴷ ⵓⵎⴰⵔⴰ ⴰⵎⴰⵜⴰⵢ ⵏ ⵜⵙⴰⵡⴰⵢⵜ ⴷ ⵓⴳⵓⴳⴰⵙⵙⵓⵔ

ⵉⵍⵜⵖ ⵎⵃⵏⴷ ⵍⵄⵏⵚⵕ ⴳ ⵓⴽⴰⴱⴰⵕ ⵏ ⵓⵎⵓⵙⵙⵓ ⴰⵎⴷⵏⴰⵏ ⴳ ⵓⵙⴳⴳⵯⴰⵙ ⵏ 1975, ⵉⴳ ⴰⴳⵎⴰⵎ ⴳ ⵜⵄⵄⵓⵔⵎⴰ ⵜⴰⵎⴷⵏⴰⵏⵜ, ⴷ ⵜⵙⵇⵇⵉⵎⵜ ⵜⴰⵏⴰⵎⵎⴰⵙⵜ ⵏ ⵓⴽⴰⴱⴰⵕ, ⴰⵍⵍⵉⵖ ⵉⵍⵍⴰ ⵓⵙⵜⴰⵢ ⵏⵏⵙ ⴷ ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⴽⴰⴱⴰⵕ ⴳ 1986, ⴷⴼⴼⵉⵔ ⵏ ⵉⴳⵍⵍⵉⵏ ⵍⵎⵃⵊⵓⴱⵉ ⴰⵃⵕⴹⴰⵏ, ⵢⵉⵍⵉ ⴳ ⵜⵏⴰⵔⴰ ⵏ ⵓⴽⴰⴱⴰⵕ ⵏ ⵜⴰⵢⴷⵔⵜ ⴰⵔ ⵓⴳⵔⴰⵡ ⵏ 2022 ⵙ ⵓⵎⴽⵕⴰⴹ ⵏ ⵎⴰⵕⵕⴰ ⵜⵉⵃⴰⵔⴰⴽⵉⵢⵉⵏ ⴷ ⵉⵃⴰⵔⴰⴽⵉⵢⵏ ⴽⵓ ⵎⴰⴷ ⵜⵍⴰ ⵜⵉⵣⵉ ⴰⴷ.

ⵉⴳⴰ ⵎⴰⵙⵙ ⵍⵄⵏⵚⵕ ⴰⵎⴰⵡⵙⴰⵙ ⵏ ⵜⵙⴰⵡⴰⵢⵜ ⴷ ⵉⵎⵢⴰⵡⴰⴹⵏ ⵊⴰⵔ 1981 ⴷ 1992, ⴷ ⵓⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⵊⴰⵔ 2002-2004, ⵊⴰⵔ 2004-2007 ⵉⴳⴰ ⴰⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵜⴳⵯⵎⵔⵜ ⵜⴰⵢⵍⴰⵏⵜ, ⵉⴳ ⴰⵎⴰⵡⵙⴰⵙ ⵏ ⵓⵡⴰⵏⴽ ⴳ 2009, ⴳ ⵉⵏⵏⴰⵢⵔ 2012 ⵉⴳⴰ ⴰⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ, ⴷⴼⴼⵉⵔ ⵏⵏⵙ ⴰⵎⴰⵡⵙⴰⵙ ⵏ ⵓⵚⴽⵓ ⴷ ⵓⵙⵓⵊⴷ ⵏ ⵡⴰⴽⴰⵍ ⴰⵏⴰⵎⵓⵔ, ⵉⵍⵎⵎⴰ ⴰⵎⴰⵡⵙⴰⵙ ⵏ ⵢⵉⴳⵔ ⵏ ⵉⵄⵔⵔⵉⵎⵏ ⴷ ⵜⵓⵏⵏⵓⵏⵜ. ⴳ ⵛⵓⵜⴰⵏⴱⵉⵔ 2015, ⵉⵍⵍⴰ ⵓⵙⵜⴰⵢ ⵏⵏⵙ ⴳ ⵢⵉⵅⴼ ⵏ ⵓⵙⵇⵇⵉⵎ ⵏ ⵜⵎⵏⴰⴹⵜ ⵏ ⴼⴰⵙ ⵎⴽⵏⴰⵙ, ⵉⵙⵙⵉⵅⴼ ⵓⵍⴰ ⵜⴰⴳⵔⴰⵡⵜ ⵏ ⴰⵢⵜ ⴱⴰⵣⴰ, ⴷ ⵜⴳⵔⴰⵡⵜ ⵏ ⵉⵎⵓⵣⵣⴰⵔ ⵎⵔⵎⵓⵛⴰ ⵍⵍⵉ ⵎⵓ ⵢⵉⵡⵙ ⴳ ⵓⵙⴽⵔ ⵏⵏⵙ, ⵖⵎⴽ ⴰⵏⵏ ⴷ ⵜⵏⵙⵙⵉⵅⴼⵜ ⵏⵏⵙ ⵏ ⵜⵎⵏⴰⴹⵜ ⵏ ⴼⴰⵙ ⴱⵓⵍⵎⴰⵏ ⴳ ⵓⴱⵟⵟⵓ ⴰⵏⴰⴽⴰⵍ ⴰⵇⴱⵓⵔ...

ⵉⵜⵜⵓⵙⵜⴰⵢ ⵎⴰⵙⵙ ⵎⵃⵏⴷ ⵍⵄⵏⵚⵕ ⴷ ⴰⵎⴰⵔⵉ ⴰⴱⵕⵍⴰⵎⴰⵏⵉ ⵙⴳ ⵜⵙⴳⴰ ⵏ ⴱⵓⵍⵎⴰⵏ ⵙⴳ 1993 ⴰⵔ ⵓⵙⴳⴳⵯⴰⵙ ⵏ 2016, ⵜⴰⵔ ⵜⵉⵡⴰⵍⴰⵜⵉⵏ ⵍⵍⵉⵖ ⵉⴳⴰ ⴰⵎⴰⵡⵙⴰⵙ ⵙ ⵉⵙⵎ ⵏ ⵓⵎⵓⵙⵙⵓ ⴰⵎⴷⵏⴰⵏ.

ⴰⵔ ⵖⵉⵍⴰⴷ ⵉⴳⴰ ⵎⴰⵙⵙ ⵍⵄⵏⵚⵔ ⴰⵏⴱⴷⴰⴷ ⵏ ⵉⴷ ⴱⴰⴱ ⵏ ⵜⵙⵔⵜⵉⵜ ⵉⵎⵖⵔⵉⴱⵉⵢⵏ, ⵓⵔ ⵜⵙⵏⴼⵍ ⵜⵖⵉⵙⵜ ⵏⵏⵙ ⵜⴰⵙⵔⵜⴰⵏⵜ ⴷⴼⴼⵉⵔ ⵏ ⵓⴱⵔⵉⴷ ⴰⴷ ⵖⵣⵣⵉⴼⵏ ⵏ ⵜⵖⵏⵙⴰ ⵜⴰⵙⵔⵜⴰⵏⵜ, ⵉⴳ ⵓⴽⴰⵏ ⵙⵓⵍ ⵢⴰⵏ ⴳ ⵉⵎⵙⴽⴰⵔⵏ ⵟⵟⴰⴼⵏⵉⵏ ⴰⵡⴰⵍ ⵏⵏⵙⵏ ⴳ ⵓⵙⴰⵢⵙ ⴰⵙⵔⵜⴰⵏ ⴰⵎⵖⵔⵉⴱⵉ. ⵙ ⵜⵉⵔⴰⵜ ⵉⴼⴰⵡⵏ ⴰⵙ ⵉⵎⵎⴰⵖ ⴰⴷ ⵉⵙⵙⵍⴽⵎ ⵉⵎⵙⵍⵉ ⵏ ⵓⵎⴰⴹⴰⵍ ⴰⴼⴰⵔⴰⵏ ⴷ ⵉⴷⵓⵔⴰⵔ, ⴷ ⵜⵎⵙⴰⵔⵜ ⵜⴰⵎⴰⵣⵉⵖⵜ ⵙ ⵡⴰⵎⵎⴰⵙⵏ ⵏ ⵜⵖⵜⴰⵙⵜ. ⵉⵖ ⴰⴷⵍⵍⵉ ⵜⴳⴰ ⵜⵙⵔⴷⴰⵙⵜ ⵜⴰⵡⴰⵔⴳⵉⵜ ⵏ ⵜⵎⵥⵉ ⵏ ⵎⵃⵏⴷ ⵍⵄⵏⵚⵕ, ⵀⴰⵜⵉ ⵜⴰⵖⵍⴰⵖⴰⵍⵜ ⵏ ⵜⵡⴰⵔⴳⵉⵜ ⴰⴷ ⴷ ⵉⵡⵜⵜⴰⵙⵏ ⵏⵏⵙ ⵍⵍⴰⵏ ⵉⵍⵉⵏ ⵓⴽⴰⵏ ⵙⵓⵍ ⴳ ⵓⴳⵯⵏⵙ ⵏ ⵜⵎⵔⵙⴰⵍ, ⵉ ⵍⵎⵖⵔⵉⴱ ⴳ ⵍⵍⴰⵏ ⵉⵣⵔⴼⴰⵏ ⵏ ⴽⵓⵢⴰⵏ, ⴷ ⵓⵡⴰⵏⴽ ⵉⴷⵓⵙⵏ, ⴷ ⵜⵎⵓⵔⵜ ⴳ ⵜⵍⵍⴰ ⵜⵏⴼⵔⵓⵜ ⴷ ⵓⵔⴳⴳⵉⴳ, ⵙ ⵜⵣⵣⵓⵍⵜ ⵏ ⵓⵏⵙⵙⵉⵅⴼ ⵏ ⵓⴽⴰⴱⴰⵕ ⵏ ⵓⵎⵓⵙⵙⵓ ⴰⵎⴷⵏⴰⵏ ⵍⵍⵉ ⴰⵙ ⵉⴼⴽⴰ ⵓⴳⵔⴰⵡ ⴰⵏⴰⵎⵓⵔ ⵡⵉⵙ 14 ⵏ ⵓⴽⴰⴱⴰⵕ ⵉⵜⵜⵓⵙⵏⵎⴰⵍⴰⵏ ⴳ ⵕⵕⴱⴰⵟ ⵓⵙⵙⴰⵏ ⵏ 25 ⴷ 26 ⵏⵓⵡⴰⵏⴱⵉⵔ 2022.

ⵉⴳⴰ ⵎⴰⵙⵙ ⵎⵃⵏⴷ ⵍⵄⵏⵚⵕ ⵜⴰⵎⴽⵯⵜⵉⵜ ⵜⴰⵙⵔⵜⴰⵏⵜ ⵜⴰⵏⴰⵎⵓⵔⵜ ⵉⵙⵜⴰⵡⵀⵎⵎⴰⵏ, ⵉⴷⴷⵔ ⴽⵉⴳⴰⵏ ⵏ ⵜⵎⵙⴰⵔⵉⵏ, ⵉⵏⵢⴰⵍⴽⴰⵎ ⴷ ⴽⵉⴳⴰⵏ ⵏ ⵉⵡⵔⵉⴽⵏ ⵍⵍⵉ ⵕⵛⵎⵏⵉⵏ ⴰⵎⵣⵔⵓⵢ ⵏ ⵍⵎⵖⵔⵉⴱ ⵙⴳ ⵎⴰⴷ ⵢⵓⵎⵥ ⵜⴰⵙⵉⵎⴰⵏⵜ ⵏⵏⵙ, ⴰⵖⴱⴰⵍⵓ ⴰⴷ ⵉⴷⴷⵔ ⵓⴽⴰⵏ ⴰⵔ ⵢⴰⴽⴽⴰ, ⵉⴳ ⴱⴰⴱ ⵏ ⵓⵙⵓⴼⵓ ⵏ ⵜⵎⵓⵔⵜ ⵏⵏⵙ ⴷ ⵜⴳⵔⴰⵡⵜ ⵏⵏⵙ ⵜⴰⵙⵔⵜⴰⵏⵜ.